E-Signo Visual Premio do I Concurso de Iniciativas da Rede de Dinamización


Principal > E-SignoVisual

Benvidos e benvidas ao espazo web do E-SignoVisual, dicionario virtual de termos tecnolóxicos que combina a Lingua de Signos Española, a Lingua Galega, as Novas Tecnoloxías e o Software libre.

Este proxecto é unha iniciativa de catro dinamizadores/as da Rede de Dinamización da Sociedade da Información da Consellería de Innovación e Industria: Paqui García, Vanesa Pérez, Ibán Vázquez e Alejandro Rancaño en colaboración coa Asociación de Persoas Xordas de Lugo (ASORLU), cuxos socios e socias participaron no dicionario realizando unha das partes fundamentais do E-SignoVisual: os vídeos de LSE.

E-SignoVisual naceu co gallo das Letras Galegas e do Día de Internet, o 17 de maio, cando a Rede de Dinamización da Sociedade da Información propuxo a posibilidade de realizar distintas iniciativas que tiveran en conta as características sociais dos distintos colectivos obxectivo da dinamización.

En todo o proceso de elaboración combináronse dous aspectos fundamentais para o traballo de dinamización tecnolóxica: o factor humano e social e o técnico.

Os obxectivos que se pretende acadar co E-SignoVisual resúmense en tres:

  • Incorporar ás Persoas Xordas nunha cultura de Rede fomentando que sexan as verdadeiras axentes do cambio.
  • Proporcionar na Rede unha plataforma de apoio para a dinamización feita para e por Persoas Xordas e aberta á sociedade en xeral.
  • Achegar a Lingua Galega ao colectivo de Persoas Xordas.

O E-SignoVisual xorde da necesidade de crear unha ferramenta que:

  • Apoie o traballo diario de dinamización tecnolóxica con Persoas Xordas e que teña en conta a LSE (Primeira lingua para as Persoas Xordas).
  • Implique activamente ás persoas xordas, sendo deste xeito protagonistas e verdadeiras axentes do cambio como mecanismo de inclusión na S.I.
  • Poña a disposición da Rede e do resto de dinamizadores/as unha plataforma que vencelle os termos tecnolóxicos, a LSE e a lingua galega.

Esta iniciativa tamén xorde da natureza do propio proxecto da Rede de Dinamización da Sociedade da Información no PEGSI (Plano Estratéxico Galego Da Sociedade da Información) e que busca a alfabetización dixital na totalidade da poboación, e moi especialmente en todos aqueles colectivos que posúen dificultades para o acceso ás Novas Tecnoloxías.